Exodus 8

Inhlupheko yesibili: Amaxoxo

1INkosi yasisithi kuMozisi: Yana kuFaro uthi kuye: Itsho njalo iNkosi: Yekela abantu bami bahambe ukuze bangikhonze ^a. 2Uba-ke usala ukubayekela bahambe ^b, khangela, ngizatshaya yonke imingcele yakho ngamaxoxo ^c. 3Njalo umfula uzanyakazela ngamaxoxo, azakhuphuka, angene endlini yakho, lekamelweni lakho lokulala ^d, laphezu kombheda wakho, lendlini yenceku zakho, laphezu kwesizwe sakho, lemaziko akho, lemiganwini yakho yokuxovela ukudla; 4lamaxoxo azakhuphukela kuwe, lesizweni sakho lezincekwini zakho zonke.

5INkosi yasisithi kuMozisi: Tshono kuAroni uthi: Yelula isandla sakho ^e ngentonga yakho phezu kwemifula, phezu kwezifula, laphezu kweziziba, wenze amaxoxo akhuphukele elizweni leGibhithe. 6UAroni waseselula isandla sakhe phezu kwamanzi eGibhithe; lamaxoxo akhuphuka, asibekela ilizwe leGibhithe ^f. 7Labalumbi benza njalo ngamalumbo abo ^g, benza amaxoxo akhuphukela elizweni leGibhithe.

8UFaro wasebabiza oMozisi loAroni wathi: Ncengani iNkosi ^h ukuthi isuse amaxoxo kimi lesizweni sami; njalo ngizayekela isizwe sihambe ukuthi bahlabele iNkosi. 9UMozisi wasesithi kuFaro: Woba lodumo ngaphezu kwami. Ngizakuncengela nini lenceku zakho, lesizwe sakho, ukuchitha amaxoxo asuke kuwe lendlini zakho, asale emfuleni kuphela? 10Wasesithi: Kusasa. Wathi-ke: Njengelizwi lakho, ukuze wazi ukuthi kakho onjengeNkosi uNkulunkulu wethu ⁱ. 11Njalo amaxoxo azasuka kuwe lezindlini zakho lezincekwini zakho lesizweni sakho, asale emfuleni kuphela. 12UMozisi loAroni basebephuma kuFaro. UMozisi wakhala eNkosini ngenxa yamaxoxo eyayiwabekile phezu kukaFaro. 13INkosi yenza-ke njengelizwi likaMozisi; amaxoxo asesifa ephuma ezindlini, emagumeni lemasimini. 14Basebewabuthelela inqwaba ngenqwaba; lelizwe laba levumba. 15Kodwa uFaro ebona ukuthi sekungcono ^j, wenza inhliziyo yakhe yaba nzima ^k, ukuthi kabalalelanga, njengokutsho kweNkosi.

Inhlupheko yesithathu: Imiyane

16INkosi yasisithi kuMozisi: Tshono kuAroni uthi: Yelula intonga yakho, utshaye uthuli lomhlaba, ukuze lube yimiyane elizweni lonke leGibhithe. 17Basebesenza njalo; ngoba uAroni welula isandla sakhe ^l silentonga yakhe, watshaya uthuli lomhlaba; lemiyane yaba khona ebantwini lezifuyweni ^m; lonke uthuli lwaba yimiyane elizweni lonke leGibhithe. 18Labalumbi benza njalo ngamalumbo abo ⁿ ukuveza imiyane, kodwa babengeke. Ngakho imiyane yaba sebantwini lezifuyweni. 19Labalumbi bathi kuFaro: Lokhu kungumunwe kaNkulunkulu ^o. Kodwa inhliziyo kaFaro yaba lukhuni ^p, kazabezwa, njengokutsho kweNkosi.

Inhlupheko yesine: Izibawu

20INkosi yasisithi kuMozisi: Vuka ekuseni kakhulu, uzimise phambi kukaFaro ^q; khangela uphuma esiya emanzini, njalo uthi kuye: Itsho njalo iNkosi: Yekela abantu bami bahambe bangikhonze ^r. 21Ngoba uba ungasiyekeli isizwe sami sihambe, khangela ngizathumela umtshitshi wezibawu kuwe lezincekwini zakho lesizweni sakho lendlini zakho; lezindlu zamaGibhithe zizagcwala umtshitshi wezibawu futhi lomhlabathi ezikuwo. 22Kodwa ngalolosuku ngizakwehlukanisa ilizwe leGosheni ^s esihlala kulo isizwe sami, ukuthi kungabi khona lapho umtshitshi wezibawu, ukuze wazi ukuthi ngiyiNkosi phakathi kwelizwe ^t. 23Njalo ngizamisa umehluko phakathi kwesizwe sami lesizwe sakho; kusasa kuzakuba lesibonakaliso lesi. 24INkosi yasisenza njalo; kwasekufika umtshitshi onzima wezibawu ^u endlini kaFaro lezindlini zezinceku zakhe lelizweni lonke leGibhithe; ilizwe lonakala ngenxa yomtshitshi wezibawu.

25UFaro wasebabiza oMozisi loAroni, wathi: Hambani, lihlabele uNkulunkulu wenu kulelilizwe. 26Kodwa uMozisi wathi: Kakulunganga ukwenza njalo, ngoba sizahlabela eNkosini uNkulunkulu wethu okunengekayo kwamaGibhithe ^v; khangela, uba sihlaba okunengekayo kwamaGibhithe phambi kwamehlo awo, kawayikusikhanda ngamatshe yini ^w? 27Sizahamba ummango wensuku ezintathu enkangala, sihlabele-ke iNkosi uNkulunkulu wethu njengoba izakutsho kithi ^x. 28UFaro wasesithi: Mina ngizaliyekela lihambe ukuthi lihlabele iNkosi uNkulunkulu wenu enkangala; kodwa lingayi khatshana kakhulu; lingincengele ^y. 29UMozisi wasesithi: Khangela, ngiyasuka kuwe, ngizayincenga iNkosi ukuze umtshitshi wezibawu usuke kuFaro, ezincekwini zakhe, lesizweni sakhe kusasa; kuphela uFaro angaphindi akhohlise ngokungayekeli isizwe sihambe, sihlabele iNkosi ^z.

30UMozisi wasephuma kuFaro, wayincenga iNkosi. 31INkosi yasisenza njengelizwi likaMozisi; yasusa umtshitshi wezibawu kuFaro, ezincekwini zakhe lesizweni sakhe; kakusalanga lesisodwa. 32Kodwa uFaro wenza inhliziyo yakhe yaba nzima ^aa langalesisikhathi, kayekelanga isizwe sihambe.